Претседателот на Демократската унија за интеграција Али Ахмети денеска во Тетово се сретна со француската амбасадорка Лоренс Оер и со Рено Дорлиак, одговорен за Балканот при француското Министерство за одбрана.
Француската амбасадорка, како што информира ДУИ, му честитала на Ахмети за постигнатиот резултат на парламентарните избори и за посветеноста на партијата кон евроатлантските интеграции.
Од француска страна била истакната поддршката во процесот на пристапување на Македонија кон НАТО и ЕУ и охрабрување локалните власти да се обидат да постигнат компромис за сите отворени прашања.
Ахмети се заблагодарил за француската поддршка и посочил дека е време за сериозна посветеност од меѓународната заедница за постигнување компромис со Грција.
– Македонија има потреба за одржлива стабилност и безбедност, здрави меѓуетнички и меѓусоседски односи, како и економски развој. Сите тие предуслови овозможуваат благосостојба во општеството. Но, сето тоа се постигнува само преку членството во НАТО. Страните треба што е можно поскоро да седнат и конструктивно да разговараат до пронаоѓање компромис. Овој процес треба да се помогне и од страна на меѓународната заедница бидејќи успехот на овие разговори ќе има позитивно влијание врз земјата и регионот, исто како и договорот меѓу Приштина и Белград, рекол Ахмети.
Тој оценил дека постои простор засегнатите страни да седнат и да разговараат за изнаоѓање компромис за последниот предлог на медијаторот Метју Нимиц.
На средбата се разговарало и за подготовките околу самитот на НАТО во септември во Кардиф при што соговорниците повториле дека одлуката на Алијансата од Букурешт во 2008 година се уште е во сила и оти за членството на Македонија во НАТО не е потребно да се повика проширувачки самит.
Ахмети ги информирал соговорниците и за разговорите за формирање на новата влада, како и за подготовките за изборниот конгрес на ДУИ што ќе се одржи на 5 јуни во Тетово.