По кратката средба со Централното Претседателство во Мала Речица, лидерот на ДУИ, Али Ахмети, истакна дека не гледа светло на крајот од тунелот.
– Максимално се трудиме да ја решиме кризата, но не зависи само од нас, туку од сите партии. Некои од партиите ги блокираат државните институции. Во моментов не гледам светло на крајот од тунелот, но се надевам дека сите партии ќе дадат свој придонес да излеземе од кризата, рече Ахмети.
Во одговор на прашање за моменталниот однос на Никола Груевски и ВМРО-ДПМНЕ кон останатите партии, тој кажа дека заканувања и уцени нема да ја решат кризата. Ахмети нагласи дека острата реторика не ѝ е потребна на Македонија, туку ѝ е потребен разумен компромис.
Запрашан за тоа дали ќе ги повлекуваат министрите од техничката влада, Ахмети кажа дека не гледа причина за тоа, бидејќи и онака таа влада е во оставка.
– Во моментов сме сконцентрирани да избереме претседател на Собранието, рече Ахмети.