Изборниот законик, Државната изборна комисија, улогата на ОДИХР во предвремените избори следната година биле тема на денешната средба на лидерот на ДУИ Али Ахмети со делегација на ОБСЕ-ОДИХР претставена од Јан Хаукас и Беата Мартин Розумилович.
Како што соопшти ДУИ, Ахмети истакна дека партијата ги поддржува препораките на ОДИХР и ќе се ангажира тие да бидат вклучени во изборниот законик, особено препораката за балансирање на гласовите за пратеник во Македонија во споредба со припадниците во дијаспората.
– Во врска со активното регистрирање на гласачите, Ахмети изрази сомнеж за изводливоста на овој процес затоа што тоа го негира правото на глас на повеќе граѓани кои привремено живеат во странство. Избирачкиот список треба да биде исчистен на транспарентен начин, со набљудување на политичките партии и на меѓународната заедница, преку административна споредба на сите постоечки бази на податоци во институциите во земјата како и сите проверки на терен, се наведува во соопштението.
Лидерот на ДУИ ја истакна потребата за стручно вклучување на ОДИХР во работните групи на политичките партии во земјата за време на разговорите околу изборните реформи.
Во однос на избирачкиот модел, Ахмети нагласи дека ДУИ се залага за отворени листи на кандидати и проценува дека моделот со шест изборни единици е порепрезентативен и фер, додека во однос на единиците на дијаспората, смета дека треба да се прифати препораката на ОДИХР или да им се овозможи на граѓаните кои живеат во странство да гласаат за кандидатите во Македонија, стои во соопштението од партијата.