Лидерот на Демократската унија за интеграција Али Ахмети испрати писмо до еврокомесарот Јоханес Хан во кое бара вклучување на меѓународната заедница во надминување на политичката ституација во Македонија.
– Како што дискутиравме на нашата заедничка средба, ситуацијата во земјата е загрижувачка и демократските капацитети на системот се ставени пред сериозен предизвик. Затоа, сметам дека итното и директно вклучување на Брисел, преку делегирање на политички тим засилен со правни и истражни експерти, е неопходно. Овој тим, делегиран од Европската Комисија и Европскиот Парламент, би ги осигурал сите засегнати страни дека процесот ќе биде кредибилен и со интегритет како и непристрасен што е предуслов за успешно привршување на овој случај, се вели во писмото.
Ахмети исто така бара и интензивно вклучување на Брисел и Вашингтон во посредништвото меѓу Скопје и Атина за надминување на спорот за името.
– Овој спор мора да се затвори што е можно поскоро, но решението не може да се постигне без интензивното вклучување на Брисел и Вашингтон во посредништво помеѓу Скопје и Атина. Нашите заеднички напори за да се постигне мир и да се изгради оддржлива демократија во земјава не може да се сметаат како завршени без интеграцијата на Македонија во НАТО и започнувањето на преговорите за членство во Европската Унија, истакнува Ахмети во писмото упатено до еврокомесарот Хан.