Полицијата соопшти дека 51-годишен жител на Крушево е уапсен денеска откако било утврдено дека тој е одговорен за грабежот на експозитура на Уни банка во градот што се случи вчера.
Како што претходно извести МВР, маскирано лице, со закана со пиштол, одзело пари од вработени во банката во Крушево. Случајот вчера во 16:25 часот во Полициска станица Крушево го пријавил П.Т. (36).
– По наредба на судија на претходна постапка од Основен суд Прилеп извршен е претрес во дом и помошни простории кои ги користи Т.С.(51) од Крушево, а тој бил приведен во полициска станица во врска со случајот, соопшти МВР.
Во моментот на влегувањето на ограбувачот, во експозитурата имало тројца вработени, кои под закана го отвориле банкарскиот сеф. Откако ги зел парите од сефот, ги затворил вработените во една просторија од банката и избегал. Ниту од банката, ниту од МВР не информираа за точната сума пари што ги однел крадецот.
