Земјоделците од Кривопаланечко и регионот на општина Ранковце досега најмногу аплицирале за искористување средства од ИПАРД 2 за набавка на земјдоелска механизација.
– Сите досега поднесени барања до првиот рок, 23 јуни, се однесуваат на земјоделска механизација со оглед дека претходната година немаа таква можност. Од двете општини до Подрачната единица на Министерството за земјоделство, шумарство и водостопанство се поднесени пет барања, а се очекува до крајот на рокот, кој беше продолжен, заклучно со 21 месецов, да бидат поднесени уште, информира Влатко Ристовски, советник во канцеларијата на Агенција за поттикнување и развој на земјоделството (АПРЗ) – Крива Паланка.
Финансиските средства од ИПАРД 2 се наменети за инвестиции во материјални средства на земјоделски стопанства, инвестиции во материјални средства за преработка на земјоделски и рибни производи и диверзификација на фармите и развој на бизниси.
– За сите информации кои им се потребни на земјоделците, за условите и начинот на апликација, можат да се обратат до Подрачната канцеларија на АПРЗ во Крива Паланка, секој работен ден, како и во општина Ранковце. Во секој случај, интересот на земјоделците за мерките од програмата е поголем во однос на лани, кога имало помалку апликации, додаде Ристовски.
За мерките од ИПАРД 2 може да аплицираат сите индивидуални земјоделци, со услов да имаат осигурување по кој било основ, средно образование и да достават одредени административни документи за кои можат подетално да се информираат и во АПРЗ, како и во Подрачната единица на МЗШВ – Крива Паланка.