На светските пазари, доларот зајакна во однос на кошничката валути минатата недела, по втор пат по ред, бидејќи кризата на Блискиот Исток ги поттикна инвеститорите да бараат побезбедни засолништа за капиталот.
Индексот, кој ја мери вредноста на американскиот долар во однос на шесте главни светски валути, порасна за 1,6 проценти минатата недела, на 100,49 поени.
Во исто време, доларот зајакна за 1,7 проценти во однос на европската валута, што предизвика еврото да се лизне на 1,1415 долари. Американската валута зајакна и во однос на јапонскиот јен, за 1,2 проценти, што предизвика доларот да достигне 159,70 јени.
Инвеститорите не се склони кон поризични инвестиции бидејќи цените на нафтата скокнаа за повеќе од 35 проценти во последните две недели, откако започнаа нападите на САД и Израел врз Иран.
Иако американскиот претседател Доналд Трамп со денови изјавува дека САД и Израел победиле, кризата на Блискиот Исток не се смирува. Иран продолжува да го ракетира Израел и соседните земји и ги блокира танкерите да минуваат низ Ормутскиот теснец, што го потресе пазарот на нафта.
Силниот и продолжен пораст на цените на нафтата би можел да има многу негативно влијание врз економиите на еврозоната и Јапонија, кои се во голема мера зависни од увозот на нафта, додека американската економија би можела да се справи малку подобро бидејќи САД се нето извозник на нафта.