Македонија не заостанува многу зад другите европски земји во однос на енергетската ефикасност, кадри од оваа област има, но добро е тие да се сертифицираат, велат од Стопанската комора. Во ваков случај и градежниот сектор би бил поконкурентен.
На Македонија и се потребни најмалку 9.600 обучени работници за да ја реализира стратегијата која предвидува до 2020 година енергетски ефикасни да бидат 35 проценти од јавните објекти.
– Во земјава постои кадар кој работи на енергетски ефикасни објекти, но тоа засега не е препознаено. Проектот „Билд – ап скилс“ почнува со обука на тренери кои своите вештини за енергетска ефикасност потоа ќе ги пренесат на работниците, истакна денеска на прес-конференција Јадранка Аризанковска од Дирекцијата за меѓународна соработка при Комората.
Повикот е распишан пред пет дена и ќе трае до 15 март. Кандидатите треба да имаат завршено високо образование во областа на градежништвото, електроенергетиката, архитектурата и машинството, четиригодишно средно техничко или тригодишно стручно со трет степен на квалификации. Потребно е и работно искуство од најмалку пет години во струката, како и минимум две години во спроведување мерки за енергетска ефикасност.
Како што нагласи Аризанковска, од проектот треба да произлезат вкупно 200 тренери. Обуките ќе траат 10 дена, а по нивното завршување кандидатите ќе стекнат сертификати валидни и во Хрватска и во Словенија како земји-учеснички во „Билд-ап скилс“ иницијативата.
Согласно најновите законски измени, за добивање дозвола за градба, мора да се приложи и елаборат за енергетска ефикасност. Ова важи и за станбените објекти. И старите објекти треба да подлежат на подобрување на енергетската ефикасност, не само преку фасадите, туку и преку подовите, крововите.
– Македонија располага со обучени инженери, архитекти, градежници, електроинженери кои имаат овластувања, а збир на неколку овластувања прават лиценца на фирми кои ќе ги изработуваат елаборатите за енергетска ефикасност, нагласи Марија Петроска од Стопанската комора.