Вицепремиерот и министер за финасии Зоран Ставрески очекува на денешната средба со Мисијата на ММФ во Скопје да има, како што рече, здрава и плодна дискусија, како што е вообичаено.
– ММФ доаѓа во Република Македонија во редовна посета и ова е прва мисија на новиот шеф на Мисијата на ММФ за Република Македонија. Попладнево почнуваме со состаноци во Министерството за финансии. Со Мисијата на ММФ, како и вообичаено, ќе разговараме за економската состојба, ќе размениме мислења и сугестии за тоа какви се перспективите за наредната година и за следните неколку години, изјави вицепремиерот Ставрески на паузата на Конференцијата за започнување на проектот „Обука за внатрешни ревизори во јавниот сектор“ (TAIPS) во одговор на новинарско прашање.
Потенцира дека на средбата нема да стане збор за искористување на остатокот на парите од линијата за буџетска поддршка за 2011 година и додаде дека за тоа веќе претходно се договориле.