Скопската компанија за производство, преработка и продажба на зрнести производи и суво овошје „Бако нутс“ преговара за зголемување на извозот, откако биле пуштени во погон машините набавени преку ИПАРД 2 програмата.
Компанијата засега, освен што го покрива македонскиот пазар, производите ги извезува во Косово и во Албанија, а во преговори е да почне да извезува во Босна и Херцеговина и во Србија.
„Капацитетот што го имав со старите машини ми беше фул за Македонија. Но со овој капацитет, со новите машини, можеме да правиме поголем извоз и преговараме. Преговараме со големи маркети во Босна, преговараме со ’Лидл’ во Србија, за да можеме целосно да го искористиме капацитетот“, вели сопственикот на компанијата, Омер Фејзулаи.
Тој објасни дека нивниот бизнис е фамилијарен, а почнале во 1943 година. На почетокот увезувале печена стока, но подоцна решиле да инвестираат, купиле машина која се уште ја имаат во фабриката и напредувале како што вели макотрпно, но успеале да се развијат. Со новите маишини Фејзулаи вели дека го подобриле квалитетот, а се отворил простор и за нови вработувања.
„Разликата во квалитетот е голема. Со старите машини производот е како печен, а со новата, која е сушара, само влажноста се вади од производот. Витамините и калориите остануваат во производот, тоа е многу битно. Многу ни се олесни работата и со новите машини за пакување. Отидовме многу напред и во производството и во квалитетот и во транспортот, доставувањето до муштериите, до маркетите“, вели сопственикот Фејзулаи.
Тој ги охрабри земјоделците да произведуваат затоа што има кој да им откупи производите, а им порача и да аплицираат за средства од ИПАРД 2 програмата за опрема, на ист начин како што направила неговата компанија.
„Многу лесно е да се аплицира и да се добие. Нема тешкотии. Треба само да имаш успешна програма и бизнис план. Земјоделците треба да се нафатат да инвестираат во земјоделска машинерија за да имаме македонски производ ние да го преработуваме и да извезуваме“, рече Фејзулаи.
„Бако“ преку ИПАРД2 има набавено линија за сушење, опрема за пакување јаткасти плодови со капацитет од еден до десет килограми, инструмент за мерење на воден активитет, гасен анализатор, а има користено и средства за изработка на деловен план и консултативни услуги. Вкупната исплатена сума за оваа инвестиција е 9.144.705 денари (околу 150.000 евра).
Денес во посета на „Бако“ беше Артан Груби, првиот вицепремиер и министер за политички систем и односи меѓу заедниците, заедно со претставници од Агенцијата за финансиска поддршка во земјоделството и руралниот развој кои искуството на „Бако“ го претставија како успешна приказна помогната од ИПАРД 2.