Над 130 македонски компании на прва средба со Лидл за можна соработка

Од:

Над 130 компании од државава денеска биле запознаени со можностите за соработка со германски Лидл, кој веќе стартуваше со инвестиција за изградба на логистички центар во Куманово.

Од компанијата соопштија дека овој тип на соработка со локални компании е еден од нивните основни постулати во секоја земја каде работат.

Стефан Георгиев, директор на секторот за набавка во Лидл Северна Македонија, во пишана изјава вели дека основната идеја на Лидл во сите земји во кои е присутен, претставува развој на локалните производствени капацитети и заеднички раст и развој со локалните партнери.

Иако, Лидл Северна Македонија се уште не е целосно оперативен, Георгиев посочува дека овој процес веќе активно функционира. Во октомври минатата година започнаа со проект за промоција на македонски традиционални производи во Лидл Србија и Лидл Бугарија, каде ги претставија македонскиот ајвар, пастрмајлијата, кочанскиот ориз, тиквешкото вино, македонското јагне и многу други производи.

– Извозот кој ќе го реализираме преку Лидл Северна Македонија до крајот на 2024 година само во овие две земји е во вредност повеќе од 2.000.000 евра или раст од четири пати во однос на минатата година. Вкусот на македонското овошје и зеленчук го направивме достапен до потрошувачите на Лидл во Србија, Бугарија, Романија, Полска, Чешка, Словачка и Германија. Од април 2023 до март 2024 година беа извезени преку 3 600 палети овошје и зеленчук. Во рамките на календарската 2024 година со нашите локални добавувачи планираме извозот на овошје и зеленчук да достигне 4 500 палети. Наведените примери и резултати се мотивација за нас и движечка сила за понатамошен успех, вели Георгиев.

Рубријан Хаџиев, генерален директор на Лидл Северна Македонија, пак, истакнува дека ќе бидат ценовно конкурентни, но оти основно ќе биде да соработуават со локалните компании.

-Брендот на Лидл е присутен во 31 земја. Како лидери во сегментот на секојдневно пазарување поставуваме стандарди кои ќе го зголемат квалитетот на понудата, а во исто време ќе бидеме ценовно конкурентни на пазарот. Но, основно за нас е да се соработува со локалните компании, посочува Хаџиев.

На 24 јануари годинава во индустриската зона Речица почна изградбата на логистичко-дистрибутивен центар. Најавената инвестиција е 80 милиони евра и треба да отвори повеќе од 150 работни места. Парцелата зафаќа површина од 170.997 метри квадратни, логистички центар од 63.000 метри квадратни и комплекс со главна зграда, административни канцеларии и напредна инфраструктура и ќе користи обновливи извори на енергија.

Во државава Лидл започна со инвестиција за изградба на логистички центар во Куманово.

Лидл е дел од групацијата Шварц, присутен во 31 земја, со промет од 114 милијарди евра, 12 200 маркети и над 380 000 вработени.

Би можело да ве интересира

Димитриевски: Лидл е најголемата инвестиција во Куманово, се очекуваат над 150 вработувања во општината

А1он

Почна изградба на логистичко-дистрибутивен центар „Лидл“

А1он

Ковачевски: Македонија станува дел од „Лидл“ семејството

„Лидл“ ги почнува активностите за изградба на логистички и дистрибутивен центар во индустриската зона „Речица“

ВИДЕО: Повторно хаос во Лидл, тепачка за апарат за вафли

Предраг Петровиќ

Хрват се обидел 28 пати да украде во Лидл и никогаш не успеал-сега му се заканува затвор