Стопанската комора на Македонија, во соработка со агенцијата за кредитен рејтинг „Coface“ – Хрватска, разви алатки со кои македонските компании можат да овозможат бонитетен извештај за одредена странска фирма со цел да добијат стабилен потенцијален партнер, како и да бидат ставени во глобалната мрежа на Групацијата „Coface“, со што странските компании ќе можат да обезбедат податоци за нив.
Валентина Цветковска од Стопанската комора, посочи дека Бонитетниот извештај е поделен во неколку сегменти.
– Компаниите добиваат деловен извештај, што претставува сигурен извор на информации. Тој може да им помогне на компаниите да формираат мислење за деловноста, профитабилноста и стабилноста на потенцијалните партнери. Исто така добиваат и финансиски извештај, што опфаќа двегодишна анализа на компанијата, истакнувајќи ги клучните показатели на бизнис насоката за дадениот период. Покрај тоа, компаниите во рамките на бонитетниот извештај, добиваат и кредитен рејтинг што овозможува проценка на ризикот на соработката со компанијата што е предмет на анализа, објасни Цветковска.
Таа информираше дека услугата Бонитетен извештај дава пристап до интернет-бази на податоци што опфаќаат над 12 милиони компании од Централна и Источна Европа, како и дека извештајот дава избор меѓу моментално пронаоѓање на претходно обработени онлајн извештаи или нарачка на најсвежи информации.
– Сертификатот “„Excellent SME MACEDONIA“ е сертификат за деловно работење што го издава Стопанската комора на Македонија во соработка со агенцијата за кредитен рејтинг „Coface“. Сертификатот можат да го добијат микро, мали и средни комании, според број на вработени, кои остваруваат над 25.000 евра годишен промет и чија оцена е минимум шест за финансиското работење за последните три години, според рејтингот на „Coface“, посочи Цветковска.
Со алатките, компаниите добиваат сигурност и гаранција за рејтингот на странската компанија, обезбедувајќи на тој начин стабилен потенцијален партнер во услови на развивање на извозната мрежа на своето производство.