Државниот пазарен инспекторат ќе спроведува координирани контроли на тезгите на зелените пазари и во продавниците за овошје и зеленчук заедно со Министерството за внатрешни работи и со Управата за јавни приходи.
По најновата одлука на Владата за замрзнување на овошјето и зеленчукот, ДПИ ќе проверува на терен да ли се навистина замрзнати цените, но нема конкретен одговор како ќе ги казнуа оние препродавачи на пазарите кои немаат регистрирана дејност.
– ДПИ по донесување на најновата одлука за замрзнување на овошјето и зеленчукот ќе настапи координирано со МВР и УЈП, со сите други институции кои се надлежни – рече Горан Трајковски, директор на Државниот пазарен инспекторат.
Министерот Крешник Бектеши е убеден дека трговците ќе ја почитуваат мерката затоа што важи само 25 дена или до почетокот на пласирањето на домашните производи.
– Инспекторатите се независни и даваат извештаи на Владата и затоа сме ги задолжиле сите инспекциски служби во земјава да направат контроли согласно нивната надлежност. Ги повикавме и комисијата за заштита на конкуренцијата затоа што знаеме дека има одредени производители и увозници кои покриваат 70-80 отсто на пазарот на одреден производ.
Убеден сум дека нашите трговци ќе ја почитуваат мерката затоа што важи 25 дена. Моментално сме увозно зависни и немаме домашно производство и мора да ги ограничиме маржите – додаде Бектеши.