Борбата против високата невработеност е главна задача на Европјаните дури и во државите со ниска стапка на невработеност, како што е Германија, сметаат повеќето анкетирани Европјани.
Во истражувањето „Предизвик на Европа 2013“, која ја спроведе институтот Гфк Вереин, се наведува дека повеќе од 13.300 анкетирани во дванаесет држави сметаат дека невработеноста е најголем проблем, кој мора да се реши што поскоро.
Во Германија, Франција, Италија, Шпанија, Полска, Австрија, Велика Британија, Белгија и Шветска невработеноста е една од најголемите грижи на граѓаните.
Дури 72 проценти од анкетираните во Шпанија изјавиле дека се најзагрижени поради високата стапка на невработеност, а во Франција 69 проценти.
Во Велика Британија 24 проценти од испитаниците сметаат дека невработеноста е суштински проблем во нивната држава.
Само во Русија и Холандија невработеноста не е препознаена како еден од главните проблеми во државата. За нив проблем се инфлацијата, куповната моќ и економската стабилност.
Меѓутоа во најновата анкета 32 проценти Германци како најголем проблем во државата ја навеле невработеноста, додека во 2010 година 66 проценти од нив биле преокупирани со тој проблем, а во 2006 година дури 80 проценти.
Седум проценти од анкетираните Европјани корупцијата ја сметаат за голем проблем.
Елена Георгиевска