Извршната директорка на Меѓународниот Монетарен Фонд (ММФ) Кристин Лагард вчера на почетокот на пролетното заседание на Фондот и Светската банка во Вашингтон апелираше развиените земји да го поттикнат економскиот раст и да применат мерки за надминување на глобалната криза која трае веќе пет години.
Таа истакна дека Европа, Јапонија и САД не вложуваат доволно напори за повторно воспоставување на цврсто и одржливо темпо на глобалниот економски раст.
-Светското стопанство и понатаму се соочува со значајни проблеми, со ризик за продолжување на периодот на кризата-изјави Лагард, и додаде дека се појавуваат нови ризици поради економските мерки кои се применуваат, како и кочниците кои го спречуваат економското опоравување.
Лидерката на ММФ истакна дека ја радува тоа што се избегнати катастрофи, како распадот на еврозоната, но сепак на развиеното стопанство му даде негативна оценка.
-Американските јавни финансии, и понатаму се во неодржлива состојба, и потребен е целокупен план за остварување на поголеми приходи. Во Јапонија која има најголем долг во светот, примената на краткорочни стимулативни пакети, го зголемува ризикот на државните финансии, поради што Токио мора да направи амбициозен планза фискална консолидациаји стратегија за раст – нагласи таа.
Кога станува збор за Европа, Лагардова истакна дека еврозоната има најголема потреба да го избалансира поттикнувањето на растот со потребни реформи.
-Глобалното стопанство го избегна најлошото, но тоа никако не значи дека се надминати проблемите -заклучи Кристин Лагард.
Елена Георгиевска