Новата антикризна програма за Украина, која е одобрена вчера од Советот на директорите на Меѓународниот монетарен фонд (ММФ), е спроведена со „исклучителен ризик“, кој најмногу произлегува од конфликтот во источниот дел од земјата, изјави заменик директорот на ММФ, Дејвид Липтон.
– Ваквиот ризик може да влијае врз способноста на земјата да продолжи со напорите за стабилизација и врз структурните промени кои се неопходни за обновување на економскиот раст. Од друга страна кризата открива и одлична можност за Владата решително да расчисти со минатото и да започне спроведување на реформаторска и стабилна политика, истакна Липтон.
Советот на директорите на ММФ одобри четиригодишна програма за кредитна помош на Украина во вредност од 17,5 милијарди долари. Пет милијарди долари од оваа сума властите во Киев можат да ги добијат веднаш, а уште толку до крајот на годинава.