Првиот човек на ССМ, Живко Митрески смета дека законот со кој хонорарците од свој џеб ќе плаќаат здравствено и пензиско на државата е добар и е во нивна полза.
Според него на овој начин ќе се сузбиела нелојалната конкуренција а трудот ќе се вреднувал вистински.
Како ССМ го поддржувале законот кој не важи за пратеници, поротници, именувани функционери кои државата ги ослободи од оваа давачка, а како обврска им ја наметна на сите „обични“ граѓани.
„Ставот на ССМ е јасен и беше кажан пред еден месец. За нас како синдикат значајно е овие работници да бидат внесени во системот на социјални осигуреници – за секој труд да биде евалуиран и да биде платен и со пензиско и со здравствотено осигурување. Со донесувањето на овој закон ќе се елиминира големата нелојална конкуренција и ќе се елминира еден голем дел на работници кои работеа во сива економија и не можеа да бидат заштитени. Според анализите голем дел од вработените во приватниот сектор работат а и се вработени со минимална плата, кај останатите беа правени злоупотреби односно еден дел беа ставени како хонорарци и беа елиминирани од сите работнички права“, изјави Живко Митрески.
Но експертите за оваа проблематика мислат различно од претседателот на ССМ Митрески.
Според нив законот е против уставен со самиот факт што не важи за сите, односно од давачки се ослободени оние лица за кои пензиското и здравствено треба да ги плати државата, зашто таа ги ангажирала.
Бизнисмените и економските аналитичари предупредуваа и на злоупотребата на овој закон кој отвора можност за малверзации.
Редовно вработени многу лесно со измените предложени од владата можат да станат хонорарци. Ќе им се плаќа здравствено и пензиско но ќе им биде трансформиран работниот однос и како хонорарци не ги уживаат правата на редовно вработени-годишен одмор, боледување, К-15.
Една од нејасанотиите на овој закон е одлуката доколку хонорарец плаќа здравствено и пензиско, агенцијата за вработување го брише од листата на невработени-без заснован работен однос.
Познавачите коментираат дека одлуката на владата е фиктивно да се намали невработеноста и е уште една статистича операција од типот активни и пасивни баратели на работа.
Бизнис секторот предупреди дека нема пари за дополнителни давачки за оние кои се ангажирани по договор на дело. Една од можните сценарија е исплатата на минималец од 9.500 денари кој не подложи на давачки-индиректно уривање на вредноста на трудот.
Владата неколкупати повтори дека законот од 1-ви догодина ќе стапи на сила.
На 22-ри декември најавени се протести против овој закон.