Министрите за финансии од ЕУ ја поддржуваат одлуката на Европската комисија американската компанија „Епл“ да врати милијарди евра на Ирска, добиени како незаконски даночни олеснувања.
Денеска е втор ден од дводневниот самит на министрите за финансии од ЕУ во Братислава.
Холандскиот министер за финансии Жерун Дејселблум и неколку негови колеги повикаа „Епл“ да плати износ, кој според аналитичарите заедно со каматата може да достигне 19 милијарди евра.
Кон крајот на минатиот месец со решение на 150 страници ЕУ донесе одлука дека Ирска обезбедила на „Епл“ незаконска државна помош во вредност од 13 милијарди евра.
Даночните прашања се во надлежност за земјите членки на ЕУ, но Комисијата смета дека може да интервенира во случајот со „Епл“ бидејќи даночните олеснувања договорени со Ирска претставуваат државна помош, област што е регулирана од ЕК.
Дејселблум, кој е и претседател на Еврогрупата, изјави деак меѓународните компании се обврзани да плаќаат целосни даноци. Тој додаде дека пропустите во меѓународните даночни закони се нешто од минатото и „Епл“ ќе треба да плати даноци како во САД, така и во Европа.
„Епл“ и Ирска каде се наоѓа седиштето на американскиот технолошки гигант, ќе ја обжалат одлуката.