Лозарите протестираа пред винарската визба Тиквеш од Кавадарци, организирани од регионалниот Сојуз на лозари Агротиквешија. Тие рекоа дека е ова само предупредување доколку продолжи „апашката политика“ на Тиквеш.
Претседателот на сојузот, Љупчо Аризанов рече дека поводот за протестот била откупната политика на Тиквеш со која „бил пљачкосуван народот“.
„Еве една откупна белешка на која за 22 шеќерни единици вранец лозарот ќе добие 8 денари, а Министерството за земјоделство препорача вранецот да не биде под 12 денари. Сметам дека оваа политика, која моментално ја води Тиквеш е погубна“, рече Аризанов.
Лозарите се заканија со штрајкови и блокади за брзо време доколку не се почитуваат договорените цени, а се заканија и дека нема да дозволат зрно грозје да влезе во Тиквеш.