Меѓународниот монетарен фонд (ММФ) отворен е за измена на програмата за помош за Ирска, за да може таа презадолжена земја-членка на евро зоната да може да се врати на пазарот на долгорочни обврзници, изјави денеска директорката на ММФ, Кристин Лагард.
Таа во Даблин истакна дека ММФ е отворен за прашањата за условите и роковите за отплата на заемот.
Министрите за финансии на Европската унија минатата недела побараа од тројката кредитори (ММФ, ЕУ и Европската централна банка) да донесат одлука за продолжување на роковите за отплата на заемите одобрени на Ирска и на Португалија.
– Ние ќе ги разгледаме предлозите заедно со партнерите (ЕУ и ЕЦБ), а можам да кажам дека е императив да и се помогне на Ирска, истакна Лагард.
Ирска се надева дека ќе стане прва земја на евро зоната која ја завршила програмата за помош и во целост се врати на пазарот на обврзници. Даблин кон крајот на 2010 година, во време на глобалната финансиска криза, прими пакет помош, откако големите државни долгови ја доведоа економијата до работ на колапсот.