Постојано имаме вложувања во патната инфрастрктура, а следен проект на кој ќе биде ставен фокусот е реконструкција на патот Велес-Скопје, нагласи денеска премиерот Никола Груевски, по потпишување на договорот меѓу Универзитетот „Св. Кирил и Методиј“ и Универзитетот за финансии и економија во Ченгду за основање Институт „Конфуциј“.
– Владата на Република Македонија и Агенцијата за патишта до крајот на годината подготвуваат реконструкција, ревитализација, а некаде и проширување на нови шест регионални патишта во должина од околу 100 километри, во кои ќе се инвестира 780 милиони денари односно 12,6 милиони евра, изјави Груевски по барање на новинарите да направи пресек на вложувањата во патната инфраструктура и додаде оти покрај овие има уште многу други проекти врзани за патната инфраструктура.
Инаку, до крајот на 2013 година се очекува да завршат работите на регионалните патишта: Ангелци-Вељуша-Водоча-Баница, Радовиш-Конче-Лубница, потоа регионалниот пат Кавадарци-Мушов Гроб, Струга-Дебар, Бошков мост-Гарски мост, како и Тетово-Јажинце.