На иницијатива на Стопанската комора на Македонија, а со поддршка на Одборот за надворешна трговија и Унијата на трговско-индустриските комори и стоковни берзи на Турција, денеска ќе биде одржан Форум на тема „Земјите од Западен Балкан – регионална инвестициона дестинација и заеднички настап на трети пазари”.
Форумот, ќе го отворат Бранко Азески, претседател на Стопанската комора на Македонија и министерот за економија Ваљон Сарачини.
Овој форум е прв ваков настан на којшто ќе бидат претставени согледувањата на Република Турција, ЕУ и ЕБРД во однос на идниот развој и перцепцијата за Западен Балкан, како единствена бизнис и инвестициона дестинација.
Освен тоа, ќе се согледаат можностите земјите од Западен Балкан, преку Турција, да се вклучат во глобалните трговски и инвестициони дестинации.
На оваа тема свои излагања ќе имаат копретседателите на деловните совети на Албанско-турскиот, Босанско-турскиот, Косовско-турскиот, Македонско-турскиот, Српско-турскиот, Хрватско-турскиот и Црногорско-турскиот деловен совет.
На Форумот ќе бидат презентирани германските саеми во функција на унапредување на економијата во регионот.