Заштити се, не ризикувај! Сите граѓани ќе ги добијат своите домашни платежни картички според распоредот на печатење и издавање! Одењето во банка и чекањето во редови е непотребно и не го забрзува процесот, порача денеска министерката за финансии Нина Ангеловска во објава на својот Фејсбук профил.
Таа упатува апел и молба до сите корисници на домашна платежна картичка да го почитуваат процесот и правилата за доброто на сите.
-Не го ризикувајте здравјето и избегнете одење во банките и чекање во редовите. Сите 320.000 граѓани ќе ги добијат своите картички во предвидениот рок, најдоцна до 18.ти јули. Секоја банка има свој распоред на печатење и издавање на картичките. Одењето во банка нема да го забрза процесот и доколку картичката не е изработена нема да може да биде издадена. Ако имате прашање за банката издавач – контакт центрите на сите банки стојат на располагање. На kupuvamdomasno.gov.mk внесете го својот ЕМБГ. Проверете која банка ќе ви ја издаде картичката и кликнете на линкот на банката. Тука ќе ги добиете сите информации за кога вашата картичка ќе биде готова. Банките и преку СМС ги известуваат корисниците на картичката кога истата може да ја подигнат или кога ке им биде доставана на домашна адреса. Посетете ги страните на банките издавачи за информирање, а доколку и понатаму имате прашања нивните кол центри ви стојат на располагање, наведува Ангеловска.
Потенцирајќи им на граѓаните да не ризикуваат кога нема потреба ги предупредува дека не знаат дали некој во редот до нив е носител на КОВИД-19.