Во Собранието денеска почна комисиската расправа за ребалансот на буџетот. Според деловникот, расправата за кратењето на државниот буџет ќе трае 10 дена, поднесени се вкупно 236 амандмани.
– Во расходите повеќе од една милијарда се за Коридорот 10. Со предложениот ребаланс дефицитот ке изнесува 3,9% од БДП и со него Македонија ќе остане во групата на земји со ниска задолженост, изјави Ставрески.
И овој ребаланс, според опозициската ДПА, е дискриминаторски и антиалбански. Како резултат на сервилноста на ДУИ во владата и корупцијата на нивните функционери, во Македонија Албанците се без институционална грижа, живеат во сиромаштија и во градови без инвестиции.
– Граѓаните да разберат дека станува збор за погрешни политики и фантазии, за експлоатација и осиромашување на Албанците. Тоа е вистината за Буџетот. За Албанците се пишуваат проекти, но под притисок тие исчезнуваат. За Албанскиот театар се намалуваат средствата за 30 милиони денари, библиотеката во Тетово добива 50 милиони денари помалку, Секретаријатот за спроведување на рамковниот договор има намалување од 1 милион денари, рече Беким Фазлиу од ДПА.