Врз основа на Одлука на Владата на Република Северна Македонија, Службен весник бр. 237 од 07.11.2022 година и Одлука на Собранието на Развојна банка на Северна Македонија бр. 02-4379/1 од 13.12.2022, се изврши зголемување на почетниот капитал на банката во износ од 620.000.000,00 денари односно, издавање на 199.485 обични акции. Со ова, вкупниот капитал и резерви на банката изнесуваат 57.5 милиони евра.
Со докапитализацијата, Развојната банка го зајакнува потенцијалот за понатамошна поддршка на реалниот сектор во државата и можност на македонските компании за полесен пристап до поволни кредити. Средствата од докапитализацијата ќе бидат наменети за продолжување на кредитните линии за инвестиции за енергетска ефикасност и инвестиции во обновливи извори на енергија, како една од мерките на државата за справување со ефектите од енергетската и ценовната криза.
Развојната банка одигра значајна улога во справување со кризите изминатиов период со кои беа соочени домашните компании, преку воведување на бескаматни кредитни линии и кредитни линии со поволни каматни стапки. Енергетската и ценовната криза ја наметнаа потребата од прилагодување на компаниите кон заштеда на енергија преку инвестиции за енергетска ефикасност и инвестиции во обновливи извори на енергија кои ќе им обезбедат долгорочна заштеда на трошоци за енергенси, одржливост на пазарот, како и заштита на животната средина. Во таа насока, Развојната банка континуирано ги прилагодува своите производи во насока на поддршка на компаниите во новонастанатите услови на работење.