Музејот на македонската борба ќе го одбележи Меѓународниот ден на жената 8 Март со специјална програма насловена „Жената борец за слобода и македонска државност“.
– Низ потсетувањето на животниот пат на жените кои се бореле за слободата и државноста на Република Македонија, Музејот ќе им оддаде почит на неколку жени револуционерки од НОБ во Македонија – Вера Јоциќ, Жамила Колономос, Ибе Паликуќа, Вера Циривири Трена и Мирка Гинова, соопшти Музејот на македонската борба.
Програмата ќе ја збогатат хорот и драмската секција на ООУ „Вера Циривири Трена“ од Скопје, ансамблот „Македонија“ и студенти актери од Универзитетот за адуиовизуелни уметности ЕСРА од Скопје.
Специјални гостинки на Музејот на македонската борба ќе бидат офицерки на Генералштабот на Армијата на Република Македонија.