Во Културниот центар „Феникс“ денеска и утре ќе се одржува 3. Меѓународен фестивал на филмски сценарија „Скрипт фест 2014“, организиран од Фондацијата за културна и научна афирмација и презентација „Македонија Презент“ од Скопје.
Фестивалот ќе го отвори проф. д-р Александар Прокопиев од Институтот за македонска литература – Скопје. Ќе бидат врачени наградите на годинашните добитници: „Скрипт феникс“ на Константин Плевнеш од Универзитетот ЕСРА Скопје-Париз-Њујорк за развој на филмската култура; „Скрипт презент“ на Сунчица Уневска од „Утрински весник“ за долгогодишен придонес во филмската уметност; „Скрипт фест“ на авторот Кузман Клековски за неговиот ангажман и придонес на планот на филмот.
Специјално признание, наградата „Скрипт мост“, ќе му биде доделена на Раде Шербеџија за врвни и осведочени филмски остварувања и вредности.
По врачувањето на наградите, Ана Опачиќ од Универзитетот ЕСРА Скопје-Париз-Њујорк ќе одржи работилница на тема „Сценарио за филм“, а утре на тема „Филмското сценарио денес – меѓу желбите и реалностите“ ќе говори проф. д-р Христо Петрески.
На фестивалот „Скрипт фест“ ќе бидат прикажани повеќе краткометражни и документарни филмови, а ќе бидат промовирани и филмски изданија од Нишкиот културен центар и издавачките куќи „Феникс“ и „Маска“ од Скопје.