Претставата „Тирамису“ според текст на полската авторка Јоана Овшианко, а во режија и адаптација на Теа Беговска синоќа премиерно беше изведена на големата сцена на Народниот театар „Јордан Хаџи Константинов-Џинот“ во Велес.
„Тирамису“ е четврта продукција од Годишната програма на Велешкиот театар за 2017 година.
Режисерката Теа Беговска истакна дека претставата се занимава со постпазарната етика и естетика, преиспитувајќи го феноменот на консумеризмот и потрошувачкото општество, наспроти изгубената човечност и суштинските вредности на животот.
Материјалниот свет и општествениот систем, како што рече, е сведен само на лични интереси и затоа не изгубил и нас во одењето по тој единствен пат. – Затоа бескрајниот простор наречен универзум е единствениот свет каде не постојат лични интереси и гласно можеме да ги кажеме нашите соништа, потенцира Беговска.
Во претставата играат актерите Маја Љутков, Зорица Панчиќ, Талија Настова, Марија Стефановска, Фаик Мефаилоски, Жарко Спасовски, Душица Настова и Румена Шопова.
Сценографијата за претставата ја направи Валентин Светозарев, костимите Андреј Ѓоргиевски-Папаз, автор на музиката е Енес Беговски, видеото е на Данчо Стефков, а дизајнот на светлото на Звездан Миљковиќ.
Првата реприза на претставата е закажана за недела, втори јули.