Во рамки на вториот Меѓународен театарски фестивал „МНТ Фест“ вечер ќе гостува Националниот театар „Немзети Синхаз“ од Будимпешта со Шекспировата „Сон на летната ноќ“ во режија на Давид Доjашвили од Грузија.
– Претставата зборува за необичната врска помеѓу сонот и јавето. Најчесто се игра како лесна и весела бајка во која се испреплетуваат комични елементи и експлицитна сексуалност. Маѓепсани од љубовта и љубоморните богови, ликовите талкаат низ шумата, но на крајот сите си го наоѓаат својот партнер. Според режисерот Доjашвили, ова толкување се однесува само на површинскиот текст и не го опфаќа подлабокото значење на драмата. Остриот хумор и лежерното расположение играат важна улога во претставата на Националниот театар од Унгарија, но тоа важи само кога е присутна моќната драма на променливите чувства, желби и разочарувања, т.е. темната страна на човекот, информира МНТ за претставата.
Давид Дојашвили режирал претстави и надвор од границите на Грузија – „Сон на летната ноќ“ ја поставил и во Кралскиот национален театар во Лондон, а во Лидз, Велика Британија, ја режирал „Искушение“ од Артур Милер.
Роден е во Тбилиси каде дипломирал на Државниот институт „Руставели“. Негови познати продукции се и: „Дрво“, „Мадам Бовари“, „Три сестри“, „Саломе“… Во 2000 година првпат режирал и опера – „Лучија од Ламермур“ од Доницети за театарот „Марински“. Неодамна станал уметнички директор на Државниот музички и драмски театар „Васо Абашидзе“ во Тбилиси.
Следен фестивалски термин на „МНТ Фест“ е 5 јуни кога ќе гостува Народно позориште од Белград со претставата „Бело кафе“ на Александар Поповиќ во режија на Милан Нешковиќ.