Народниот театар-Битола е подготвен за првата премиера во 2013 година – „Тартиф“ на Молиер во режија на Сашо Миленковски. Претставата претпремиерно ќе биде изведена вечер, а премиерата е закажана за утре. Насловната улога ќе ја игра актерот Огнен Дранговски.
– Во оваа претстава имаме три пријатели. Наш најголем пријател е стихот на Молиер, потоа стилот на Молиер и третиот наш пријател е сонгот. Во пиесата „Тартиф“ ние направивме неколку интервенции, за да ја приближиме тезата за која говориме дека лесноверните ќе престанат да ги богатат сметките на луѓето кои се претставуваат дека говорат во името на Бога, рече режисерот Миленковски на прес-конференција по повод премиерата.
Покрај Дранговски, во претставата настапуваат и Јулијана Стефановска, Менка Бојаџиева, Никола Пројчевски, Маја Андоновска, Филип Мирчевски, Васко Мавровски, Душко Јовановиќ, Христина Христова-Николова, Александар Стефановски, Борче Ѓаковски, Марјан Георгиевски, Горазд Христовски и Александар Копања.
Музиката е на Венко Серафимов, сценографијата на Зоран Николовски, костимографијата на Благој Мицевски, а Александра Хонг од Бугарија ја подготви кореографијата.