Со подршка од програмата за култура на општина Гевгелија, синоќа беше промовирана збирката поезија „Јужен глас“ на Лилјана Пецова-Илиеска создадена од меѓусебни инспирации на поетски слики и уметнички експресии кои претставуваат одраз на уверувањата дека „зборот е слика и сликата е збор“.
– Пецова-Илиеска е поет со свои, нејзе својствени и иманентни поетски светови кои се опседнати од вечната тема – љубовта, љубувањето и вљубувањето што во растреперената душа и разбранетиот ум останале и станале неостварен сон по чезнатото што исчезнало и завршило,со што во душата и умот на лирскиот субјект се наталожила една придушена меланхолија, некој скршен бол и скршена тага, рече промоторот на збирката академик Георги Старделов.
Лилјана Пецова – Илиеска е родена гевгеличанка која живее и работи во Скопје. Таа е магистер по македонска книжевност и југословенски книжевности. Пишува поезија и прави обиди во литературната форма краток расказ.