Главната награда на Хрватското друштво на драмски уметници за најдобра претстава за 2014 година, во Хрватска, е доделена на претставата „Три сестри“, од Антон П. Чехов во режија на Слободан Унковски, а во изведба на Градскиот драмски театар „Гавела“ од Загреб.
Националните награди за најдобрите остварувања во областа на театарот, филмот и радиото беа соопштени вчера вечер на свеченото доделување во Загреб.Ова беше прва режија на Унковски во Хрватска, кој досега има голем број постановки на сцените во други центри, како Белград, Љубљана, Москва, Атина, Германија, САД и други.
– Јас секогаш некаде сум прв пат, без оглед на тоа дали се работи за Германија, САД или Хрватска. Кога ќе почнеме со работата, стануваме едно големо семејство и мислам дека работата на режисерот со ансамблот мора така да изгледа за да се разменат енергија и љубов. Ансамблот на театарот беше со мене, ми веруваше и ме инспирираше. Во оваа размена на енергија, направивме претстава за текот на времето и колку е комплицирано, тешко и речиси невозможно да се живее, изјави Унковски за хрватските медиуми.
Претставата „Три сестри“, гостуваше на 39. издание на фестивалот МОТ во Скопје.
А.Б.