Актерката Вероника Ечеги почина на 42-годишна возраст.
Шпанската ѕвезда беше хоспитализирана во Мадрид и почина во неделата по борба со ракот, објавија локалните медиуми.
Во текот на нејзината 18-годишна кариера, таа се појави во повеќе од 30 филмови и ТВ серии, а е најпозната по улогата во филмот од 2008 година „My Prisoner’s Yard“ , во режија на Белен Масијас и продуциран од Педро Алмодовар, пишува „Дејли меил“.
Нејзиниот пробив во шпанската кинематографија дојде со филмот „Јас сум Хуани“ (2006), кој ја лансираше во светот на славните.
Покрај успехот во нејзината родна Шпанија, во 2013 година таа глумеше во Холивуд во филмот „Студената светлина на денот“ заедно со Сигурни Вивер и Брус Вилис. Таа, исто така, го делеше екранот со британските актери Ноел Филдинг и Ричард Ајоаде во „Зајакот и бикот“ (2009).
Во 2022 година, таа се појави заедно со Сем Клафлин во двојазичната романтична комедија „Книга на љубовта“ (Prime Video). Таа исто така одигра значајна улога во серијата „Fortitude“, продукција на Amazon Prime, чие дејство се одвива во Арктичкиот круг.
Нејзиното последно појавување на екранот беше во серијата на Apple TV+ „Love You To Death“, снимена во август 2023 година и објавена претходно оваа година.
Во интервјуата на почетокот на годината, по повод промоцијата на серијата, актерката зборуваше за влијанието на болеста врз најблиските, во врска со самата тема на приказната:
„Серијата поставува многу прашања за смртта и животот, бидејќи е невозможно да се зборува за смртта без да се зборува за животот и начинот на кој го живееме“, објасни актерката.
„Мислам дека луѓето што ве сакаат се единствените што имаат храброст да ви кажат: „Дали сте размислувале дали ова е правилно? Дали сте среќни вака или не?“
Родена во Мадрид во 1983 година, Ечеги го имаше своето телевизиско деби со помали улоги во сериите „A New Life“ и „Paco and Veva“, откако ги напушти студиите по социологија за да студира на Кралското училиште за драма.