Патувачката изложба „Ана Франк – Лекции за сегашноста“ со 39 изложбени панели кои носат бројни детали од животот на малата Ана и нејзиното семејство во Втората светска војна денеска ќе биде отворена во ликовниот салон на Центарот за култура „Марко Цепенков“ во Прилеп.
На изложбата има и панели кои се креирани посебно за македонскиот контекст во периодот по Втората светска војна до денес, изработени од домашните експерти Мишо Докмановиќ и Бесник Емини. Отворањето на изложбата во Македонија беше во Министерството за надворешни работи во чест на одбележувањето на Меѓународниот ден на сеќавањето на Холокаустот – 27 јануари.
Водичи за посетителите ќе бидат млади волонтери, средношколци, кои минале обука за да ја раскажат приказната на Ана Франк.
Изложбата во Македонија е во рамки на проектот „Хисторија, Историја, Повјест – Лекции за денес“, во организација на Младинскиот образовен форум и Куќата на Ана Франк од Амстердам.
Проектот има за цел да го привлече вниманието и поттикне дискусија за настаните од блиското минато на Западен Балкан кои се причина за различни поделби и генерирање конфликти во минатиот век.