Во Уметничката галерија во Куманово вечерва беше отворена 58. изложба „Кумановски ликовни уметници“ во чест на Денот на ослободувањето на градот. Годинава на изложбата учествуваат 24 ликовни уметници со дела работени во различни ликовни техники.
– Освен делата кои ги задоволуваат класичните норми на ликовното творештво, оваа година опфатени се и дела од млади ликовни творци кои ги следат новите достигнувања во ликовното творештво и презентираа инсталации, така што заедно со сликите и графиките ја чини оваа продукција богата по својот израз и по својот квалитет, рече Анита Цветановска, директор на НУ Музеј Куманово на отварањето на изложбата.
Градоначалникот на Куманово Зоран Дамјановски ја отвори изложбата посочувајќи дека ова е годишен настан кој ги обединува ликовните уметници од градот. Оваа изложба, рече тој, е заеднички проект кој го спроведуваат локалната власт и кумановскиот музеј.
– Оваа изложба е една од двата проекта на кои заеднички работиме со НУ Музеј, проект којшто има 58 години традиција, започнат во 1956 година во чест на ослободувањето на градот. Куманово се профилира како град на уметноста, рече Дамјановски.
Изложбата се реализира со поддршка на Министертвото за култура, во соработка со НУ Музеј и градоначланикот и Советот на општина Куманово.