Нашата инспирација е жена, која на еден тивок начин успеала преку иглата и конецот, преку нејзиниот вез и облека да го овековечи битот на нашиот народ, притоа создавајќи везбена историја во која специфичните орнаменти, техниките на вез и боите на конецот трајно го одбележуваат времето на нејзиното потекло и создавање, наведе Гордана Митровска, претседателката на Здружението „Арти Крафт“ на денешното отворање на Етно одаја.
Митровска изјави дека оваа година Здружението на уметници ракотворци одбележува пет години постоење, упатувајќи благодарност до членовите, како и до Министерството за економија, за помошта што ја дале со цел да се отвори Етно одајата.
– Опремувањето на Етно одаја со предмети и производи што ги работат нашите членови претставува задоволство, но и поттик да не се запре, туку со нови сили да се продалжи таму каде што застанале нашите предци, нагласи претседателката на „Арти Крафт“.
Митровска истакна дека со отворањето на Етно одајата, Здружението упатува порака до граѓаните дека традицијата, занаетот и коренот не треба да се заборави бидејќи тоа најголемото богатство на една држава и на една нација.
Колекционерката на народни носии Достана Караѓозоска Станковска, посочи дека во Етно одајата е изложен дел од нејзините носии, односно носиите од Скопска Црна Гора и Скопска Блатија.