Охридскиот театар со хит-претставата „Детектор за лаги“ задутре гостува во Велешкиот театар „Јордан Хаџи Константинов-Џинот“, во рамките на манифестацијата „Велес град на културата 2015“.
Неколку дена подоцна, на 9 април, претставата ќе биде изведена и на сцената на Македонскиот народен театар во Скопје.
„Детектор за лаги“ е театарско дело работено по текст на Василиј Сигарев, под режисерската палка на Ненад Витанов. Во претставата играат Јасмина Билаловиќ, Никола Тодороски и Стрезо Стаматовски.
Претставата е приказна за двајца сопружници со нарушени брачни односи, а проблемите се обидуваат да ги решат со помош на психијатар – хипнотизер. Тогаш се откриваат тајните и лагите со кои сопружниците живееле со години и почнува голема театарска комедија.