Театарот на Навигаторот Цветко на 2. март, во Музејот на холокауст на Евреите од Македонија, премиерно ќе ја прикаже претставата „Солун – град на духови“. Режијата е на Слободан Унковски, а текстот е од Русомир Богдановски, инспириран од истоимената книга на Марк Мазовер.
Драмската екипа е составена од Симона Димковска, Ивана Павлаковиќ, Наталија Теодосиева, Стефан Вујисиќ, Мартин Манев, Горан Ников, Владимир Петровиќ, а музиката е авторско дело на Златко Ориѓански.
Претставата е направена со поддршка на Министерството за култура и на Музејот на холокаустот на Евреите од Македонија.
Хрониката „Солун – град на духови“, христијани, муслимани и евреи 1430 –1950 од светски познатиот историчар и професор, Марк Мазовер, е објективна хроника на животот и случувањата во текот на пет века, во најзначајниот град на Македонија. Опфаќа период од турското освојување на Солун во 1430 година, па се до депортацијата и холокаустот на 45.000 солунски евреи во логорот Аушвиц. Русомир Богдановски инспириран од оваа историска хроника развива документарно играна драма возбудлива по настаните, судбините на луѓето и течењето на времето.
Златко Ориѓански напиша повеќе оригинални песни и друга музика за оваа претстава, во духот на балканската музичка традиција.
„Солун – град на духови“ е првиот дел од трилогијата која ќе ги опфати и Лерин – полиња жито, ридишта крв во 2015 година и Скопје – Скопје во 2016 година.
Претставата се игра во Музејот на холокауст на евреите од Македонија, со почеток во 20 часот. Претпремиерата е закажана на 1. март, а реприза ќе има во сабота на 7 март. Билетите се достапни на влезот на Музејот на холокауст на Евреите од Македонија.