Во рамки на Меѓународниот фестивал на изведбени уметности „ИМПАКТ 4“ синоќа на сцената на клубот „Тарантино“ во Велес гостваше Дизел Клуб Театар од Романија со претставата „Шекспир, те сакам“, што е прво гостување на овој театар во Македонија.
Режисерот на претставата Сорин Мисиријанту појасни дека тоа е претстава направена од извадоци од претстави на Шекспир како „Ричард трети,„Хамлет“,„Ромео и Јулија“,„Како милувате“, а помеѓу нив има и негов текст.
– Се надевам дека публиката овде во Велес ја почувствува претставата и беше заедно со актерите и заедно со нив го дишеше истиот воздух, само така е постигната целта на претставата, изјави режисерот Мисиријанту.
Тој претставата ја режирал во 2008 година за да гостува на меѓународните фестивали, а досега учествувале на фестивалите во Казабланка,Мароко,Австрија и Италија.
Во претставата играат актерите Адријан Балант и Анка Лакустеано.Актерот Адријан за улогата во оваа претстава ја добил и наградата за најдобар актер на фестивалот во Казабланка.
Инаку, режисерот Сорин Мисиријанту режира од 2000 година и досега режирал 42 претстави по текстови од Шелспир,Чехов,Пушкин и други автори. Првпат е во Македонија и на фестивалот „ИМПАКТ“ и со директорот на фестивалот и режисер Александар Ивановски, како што изјави за МИА, се во разговори за заедничка театарски проект, а сака да гостува и на други фестивали и театарски сцени во Македонија.
Меѓународниот фестивал за изведбени уметности „ИМПАКТ 4 “ во Велес завршува вечерва на сцената на велешкиот театар со настап на Татарот Младинско од Словенија со претставата „Ветер на лудоста“.