Петнаесет илјади луѓе го посетиле Музејот на традиционална тиквешка храна за шест години постоење. Во музејот се изложени повеќе од 500 предмети поврзани со производство и обработка на храна, како и орудија и алати за обработка и производство на традиционална тиквешка храна.
Тие се изработени од камен, дрво, керамика и стакло. Поставката е збогатена со машка и женска народна носија која го отсликува етничкиот предел на Тиквешијата. Музејот е составен од четири оддели – археолошки, етнолошки и две спомен-соби – на Васил Хаџиманов и Никола Бадев. Спомен-собата на Бадев беше отворена во октомври 2018 година по повод стогодишнината од неговото раѓање.
Од Музејот велат за МИА дека основна цел и мисија на оваа културна институција е преку предмети и други експонати да ги запознае посетителите со основните музеолошки и културолошки вредности на самата институција, кои претставуваат сведок за богатото културно наследство во Тиквешијата. Едукацијата и запознавањето со културните вредности има различни целни групи – млади, деца од училишна и предучилишна возраст, туристички групи…
Музејот беше отворен во рамки на проектот „Гастрономски патишта – Кајмакчалан” помеѓу општините Кавадарци и Едеса, финансиран од Европска Унија преку Програмата за прекугранична соработка.