Меѓународниот Лирикон-фест од Велење, Словенија, деновиве објави антологија на европската поезија насловена „Планети со сопствена светлина”, во која се застапени и современите македонски поети – академик Ристо Василевски, Игор Исаковски, Никола Маџиров и Марта Марковска.
Како што известува издавачот, „во антологијата се застапени водечките современи поети од Европа, а врз преводите на нивната поезија работеле четириесет и еден преведувач.”
Се работи за обемна антологија во која на 470 страници се застапени вкупно сто поети. Покрај македонските поети застапени се и истакнати поетски имиња од уште дваесет европски земји: Австрија, Германија, Велика Британија, Франција, Полска, Босна и Херцеговина, Србија, Словенија, Хрватска, Бугарија, Грција, Италија, Унгарија, Црна Гора, Холандија, Литванија, Словачка, Чешка и Швајцарија.