Во Мултимедијалниот центар Мала станица вечер ќе биде отворена изложба „Уметноста на неуспехот: афективни странци“ во организација на Коалиција „Сексуални и здравствени права на маргинализираните заедници“.
Се работи за групна изложба која ангажира дел од најзначајните македонски современи уметници, со цел да ги истражат, проблематизираат и преосмислат потенцијалите за продукција на алтернативни и нехегемонски социјални и културни светови. Учествуваат уметниците Велимир Жерновски, Христина Иваноска, Ѓорѓе Јовановиќ, Нада Прља, Јане Чаловски, Неда Фирфова. Куратор е Славчо Димитров.
– „Уметноста на неуспехот: афективни странци“ ја преиспитува човековата ранливост, неизвесност и изложеност како можни основи за нови разбирања на тоа што не дефинира како луѓе и кои се нашите споделени услови врз основа на кои сме поврзани со другите и преку кои ја замислуваме и градиме заедницата вон насилните тоталитарни, хомогенизирачки и есенцијалистички политички и етички модели… соопшти организаторот на изложбата.
Таа ќе биде проследена со публикација во која ќе бидат застапени преводи на некои од најзначајните текстови во областа на родовите и квир теориите. Публикацијата ќе биде промовирана на 20 декември.