Изложба „Традиционални носии и накит од Македонија“ во Марсеј

Од:

Во музејот „Куќа на занаетчиството и уметничките занаети“ во Марсеј синоќа свечено беше отворена изложбата „Традиционални носии и накит од Македонија“ на НУ Музеј на Македонија. Изложбата, која е во рамки на македонското претставување во Марсеј – градот кој годинава го носи епитетот „европска престолнина на културата“, ја отвори министерката за култура Елизабета Канческа-Милевска.

Во обраќањето пред многубројните посетители, соопшти Министерството за култура, таа истакна   дека е ова извонредна можност за граѓаните и посетителите на Марсеј да се запознаат со македонското богатство од рачно изработени носии кои ги отсликуваат македонската традиција и македонските обичаи.

– Македонија отсекогаш била точка на среќавање на најразлични етноси со различни уметнички, религиозни и културни вредности, а материјалните докази од ова присуство денеска кај нас живеат во боите на народните носии, во одблесокот на накитот, во ритуалноста на обичаите… Носиите украсени со скапоцени камења и седеф, како и уникатните парчиња филигран, претставуваат природна симбиоза меѓу вештината на занаетчиите и безвременскиот допир на уметничката креација. Затоа чувствувам неизмерна гордост што пред вас вечерва се артефактите кои се сведоштво за нашето минато, но и за нашата грижа за вредностите што ги наследивме од претходните поколенија, истакна Канческа-Милевска.

Вечерва Македонија е во Марсеј, додаде министерката за култура, а само за неколку дена ќе бидеме и во Ница, на Седмите франкофонски игри, што доволно говори за желбата да се надминат сопствените граници и да се даде искрен придонес во градењето на заедничкиот, европски идентитет.

На отворањето на изложбата му претходеше настапот на македонскиот перкусионист Зоран Маџиров, кој на оригинален начин, преку музицирањето на шишиња, ги обедини ритмите на македонската традиционална музика со класичната музика и со џезот, предизвикувајќи воодушевување придружено со бурен аплауз од многубројната публика.

Отворањето на изложбата „Традиционални носии и накит од Македонија“ и настапот на Зоран Маџиров предизвикаа голем интерес и кај медиумите, кои во голем број ја проследија презентацијата на македонската култура.

Во музејот „Куќа на занаетчиството и уметничките занаети“ министерката се сретна со директорот Жослин Грендорж-Забала и со Жак Рока Сера, заменик-градоначалник на Марсеј и претседател на музејот. На средбата, претседателот на музејот, како што се наведува, го истакна задоволството што изложбата на македонски носии и накит е 200-тата изложба презентирана во 30-годишното постоење на музејот и изрази желба македонската култура и во иднина да биде дел од програмата на овој музеј.

Канческа-Милевска се заблагодари за гостопримството и истакна дека преку изложбата посетителите ќе се запознаат со традицијата и со обичаите на народите од Република Македонија. Вчера министерката Канческа-Милевска оствари средба и со сенаторот и градоначалник на Марсеј,  Жан-Клод Годен, стои во соопштението од Министерството за култура.

Би можело да ве интересира

Културното наследство и училиштата во фокусот на Европски денови на културното наследство 2020

Ана Ололовска

Стефоска: Уште две институции не зеле јулска плата од колективниот договор

Ана Ололовска

Сите културни институции можат да работат, но со посебни протоколи

Ана Ололовска

Се прават напори манастирот во Матејче да биде прогласен за културно наследство во опасност, вели Стефоска

Ана Ололовска

Заштита на културното наследство- врвен приоритет за министерката за култура Стефоска

Ана Ололовска

Со концерт на Владимир Четкар, во Битола завршува фестивалот „Музика од светот“

Ана Ололовска

Leave a Comment

eleven + 13 =