Изложбата „Охрид/поглед од другата страна“ денеска ќе биде отворена во Музејот на Република Северна Македонија, во организација на Центарот за креативни индустрии – НЕБО од Суводол, Демир Хисар.
Изложбата се реализира во рамките на проектот „Многу луѓе – многу погледи“, којшто беше селектиран помеѓу десетте најдобри приказни на повикот „Приказни за европското културно наследство“ и е финансирана од страна на програмата „Европски денови за културното наследство“, поддржана од Советот на Европа и Европската комисија.
-Целта на приказната е да се претстави и сподели македонското културно наследство, како дел од заедничкото европско наследство, преку очите на една маргинална група – психијатриски пациенти хоспитализирани во Психијатриската болница во Демир Хисар. Идејата да се вклучат лица со ментални болести е заснована врз европските вредности за почитување на слободата, демократијата, еднаквоста и почитувањето на човековите права, вредности кои еднакво важат за секоја единка во светот во кој живееме, наведуваат организаторите.
На изложбата „Охрид/поглед од другата страна“ ќе бидат поставени ликовни дела и фотографии на група психијатриски пациенти, кои учествуваа во две работилници и за кои беше организиран тридневен престој во Охрид и разгледување на неговото културно наследство. Преку практична работа, учесниците имаа можност добиените знаења, созреани низ личното доживување, низ спознанието и идејата за културното богатство, да ги преточат во визуелна форма.