Во Државната установа „Московски дом на националностите“ во Москва отворена е самостојната изложба на македонската уметница Живка Коцева-Караџовска.
Изложбата насловена како „Моќта на енергијата и нејзината трасформација – Помеѓу“ содржи 36 слики работени во комбинирана техника (масло и акрил).
Коцева – Караџовска првпат изложува во Москва, а изложбата ќе биде отворена до 22 април.
На отворањето присуствуваа уметници и почитувачи на ликовната уметност, писатели, артисти, студенти и пријатели на Македонија како од Москва, така и од градовите Звенигород и Долгопрудниј. На отворањето се обратија претставник од македонската Амбасада во Руската Федерација и Олга Панкина, познат популаризатор на македонската култура во Русија. За ликовните дела на уметницата говореа руските сликари Александар Белугин, куратор на литературниот клуб „Подвал 1” и Светлана Орлова, претседател на група уметници „Соло” при Професионалниот сојуз на ликовните уметници на Русија.