Изложба на слики со сатирична содржина, изработени во интересна и ретка техника – масло на стакло, создадени во 1980-тите години од авторот Мице Јанкуловски, денеска е отворена во Галеријата „Остен“.
Паралелно во Галеријата „Остен“ денеска е промовирана и првата книга од публикацијата „Визуелните уметности во Македонија – 20 век“, која се осврнува на сликарство, скулптура, графика. Таа е преглед на современата уметност во Македонија, претставена во монографски формат.
Извршната директорка на „Остен“ Корнелија Конеска рече дека денешната изложба и промоција се особено значајни затоа што 2015 година е 70 години од постоењето на „Остен“, кој е формиран 1945 година.
Автори на текстовите во публикацијата се Соња Абаџиева и Емил Алексиев, додека во неа се застапени 50 автори, кои што, како што рече Конеска, се најрепрезентативни за македонската уметност во овој период.
– Особено сме горди на оваа публикација бидејќи еден преглед во ваков формат на современата уметност во Македонија досега не е направен. Публикацијата топло ја препорачувам на сите оние кои што се интересираат за уметноста за да можат да ги осознаат процесите, контекстот во кој што авторите твореле и да имаат еден квалитетен преглед на македонската современа уметност во 20-ти век, истакна Конеска.
Авторот и директор на галеријата „Остен“ Мице Јанкуловски рече дека ова се сатирични слики на стакло работени во периодот 1980-1990 година, кога интензивно се бавел со карикатура, но и интензивно работел со сликарство на стакло.
– Сликањето на стакло е една ретка техника и работејќи претходно со анимиран филм, можеби прозрачноста на фолијата ме натера голем дел од графичките карикатури да ги претворам во сатирични слики на стакло. Еден таков избор се овие 30-тина работи овде изложени, во кои доминира апстрактниот објект, фројдовски позиции во однос на сексот и црната страна на секојдневниот живот, рече Јанкуловски.
Мице Јанкуловски (Сливово, 1954) се занимава со сликарство, карикатура и анимиран филм и ја негува специфичната техника на сликање на стакло. Има реализирано 40 самостојни изложби во Македонија и низ светот и е добитник на 12 домашни и меѓународни награди и признанија.
Амбасадорот на „Остен“ и претставник на Меѓународната фондација за музика и уметност Николас Тав книгата „Визуелните уметности во Македонија – 20 век“ ја оцени како значајна, провокативна и убава, нагласувајќи дека таа во голем дел се совпаѓа со мисијата на фондацијата дека после се наша најголема оставнина за идните генерации е уметноста.
Публикацијата „Визуелните уметности во Македонија – 20 век“ е испечатена во 500 примероци и може да се купи во галеријата „Остен“.