Во Кинотека на Македонија вечерва во рамки на „Скопје филм фестивал“ продолжува детската програма „Креиераме заедно“, која се се реализира во соработка со Здружението за поддршка на деца и млади со различности „Сината птица“ од Скопје.
Филмската програма за деца е синхронизирана на македонски јазик, со адаптиран превод за лица со оштетен слух.
Програмата „Креираме заедно“, како што соопшти организаторот, вклучува и учениците со и без попреченост од осум инклузивни училишта од Скопје, Тетово и Струмица, а вчера вечер во фоајето беа изложени фотографии и цртежи изработени од учениците.
Според Мимоза Петреска Георгиева, претседател на здружението „Сината птица“, со овој проект сакаме да иницираме и поинаков начин на вклучување на луѓето со попреченост во културните манифестации не само како пасивни реципиенти туку и како креатори на културните содржини.
На 20. издание на Скопје филм фестивал вчера премиера имаше новиот македонски игран филм „Ах љубов моја“ на режисерот и сценарист Коле Ангеловски.
Ова е трет игран филм на Ангеловски, првиот беше „Колнати сме, Ирина“ во 1973, а овој доаѓа 29 години по култната комедија „Викенд на мртовци“. А Ангеловски рече оти се надева дека оваа нова македонска комедија ќе ја освежи домашната кинопублика.
Во главите улоги ги видовме младте актери Нина Деан, Атанас Атанасовски, Александар Микиќ , Соња Стамболџиева, Роберт Ристов, Жарко Димоски, Крсте Јовановски, како и Марија Кондовска, Ердоан Максут, Кристина Ласовска, Валентин Костадиновски, Ева Скендеровска, Едмонд Сотир, Андон Јовановски.
Директор на фотографија е Роберт Јанкулоски. Сценограф е Илина Ангеловска. Костимографи се Лира Грабул и Раде Василев. Монтажата е на Блаже Дулев. Дизајнер на звукот е Дарко Спасовски – Пацки. Музиката е на Венко Серафимов и Џенгиз Ибрахим.
Вечерва на репертоарот на Скопје филм фестивал во Кино Милениум е „Пеколен портокал“ на Стенли Кјубрик, додека утре во Скопје пристигнува специјалниот гостин на фестивалот, Јан Харлан, извршниот продуцент на славниот Стенли Кјубрик.