Хрватскиот амбасадор во Македонија, Златко Крамариќ беше во официјална посета на Куманово, при што имаше средба со градоначалникот Зоран Дамјановски, со кој зборуваа за проблемите во градот и актуелнита состојба во Македонија.
Градоначалникот Дамјановски рече дека Куманово досега има одлична културна соработка со Хрватска и дека му претставува чест што во неговиот град гостин е човек од држава која има направено големи чекори во однос на интеграциите во Европа.
-Направивме една конструктива дискусија, ги лоциравме нашите проблеми пред се од комуналната сфера на живеење. Двајцата сме на иста констатација дека кризата треба и мора да се надмине. Сите сме со една надеж дека работите полека ќе се отворат позитивно – изјави градоначалникот на Куманово
Амбасадорот Крамариќ изјави дека дијалогот е секогаш подобар од монолог и нагласи дека верува во политичка мудрост и зрелост на луѓето кои се одговорни во Македонија, како на државно така и на локално ниво.
-Се надеваме дека ќе се покаже зрелост која во вакви ситуации е потребна. Јас доаѓам од сферата на лингвистиката, литературата, ме научиле дека нема спогодби ако пред тоа немало недоразбирања. Мора да преовлада дијалог, компромис, ретерирање и налагање да изборите бидат слободни и фер, еднаков пристап на медиумите, се она што ја сочинува агендата на слободни и фер избори – изјави Крамариќ.