Грчките медиуми и денеска изнаоѓаат разни начини како да се занимаваат со Македонија или прашањето за името, се разбира, во поддршка на ставовите на официјална Атина за оваа тема.
Лидерот на грчката партија Независни Грци Панос Каменос, повторно во Парламентот го обвини премиерот Андонис Самарас дека не одговара на ниту едно пратеничко прашање во врска со преговорите за „името на Скопје“.
– Поднесов седум тематски прашања до премиерот за преговорите со Метју Нимиц за името на Скопје, но тој одбива да дојде во Парламентот и да одговори, рече Каменос и го потсети Самарас дека според Уставот и парламентарните закони, негова обврска е да одговори на пратеничките прашања.
Информативниот сајт „еуро2деј“, пак, осврнувајќи се на активностите на Самарас, пишува дека од патувањето на премиерот во Катар немало никаква дипломатска корист, затоа што, според дипломатски извори, немало никакви впечатоци за средбата со турскиот премиер Реџеп Таип Ердоган. Во исто време, според порталот, кабинетот на Самарас молчел и за посетата на македонскиот претседател Иванов кој во исто време престојувал во Катар и во Доха договорил инвестиции и отворање на македонска амбасада.
Провладиниот „Катимерини“ во коментарот по повод престојната посета на францускиот претседател Франсоа Оланд на Атина потсетува дека поддршката на Париз за Грција не е ограничена само на економијата, туку се протега и на дипломатско поле.
„Свежи се сеќавањата за француската силна и одлучувачка поддршка за прашањето за името на Скопје и интервенцијата на Николас Саркози во полза на Грција за време на самитот на НАТО во Букурешт. Неговиот наследник, Оланд суштински го наметна ова и на своите колеги од други моќни држави со цел да се добие едногласна одлука за ова прашање, да се постигне договор за взаемно прифатливо решение за да се унапреди процесот на интеграција на соседната земја во НАТО“, пишува „Катимерини“.
Некои медиуми, меѓу кои најгласни се воглавно националистичките информативни сајтови, се уште пишуваат за промоцијата на книгата „Европската картографија и политика: случајот на Македонија“, при што ги пренесуваат информациите во македонските медиуми, меѓу кои и МИА, дека „Аврамопулос промовирал книга за ’грчкиот карактер’ на регионот Македонија.