Судењето за „Крвавиот четврток“ продолжува со репродуцирање на СМС и Фејсбук пораки од одземениот и вештачен телефон на сведокот Сашко Коцевски, вработен во Собранието, воедно и сведок во процесот за случувањата од 27 април минатата година.
Во еден од разговорите кои ги презентираше обвинителката Ивана Трајчева, помеѓу Весна Герговска и Коцевски, Герговска на 27 април во 14 часот и 10 минути му пишува порака „Ве молам, лицата за интервентни ситуации и сите други што можете, известете ги, да бидат на готовс во секој момент, ќе дадеме насоки, ве молам за сериозност“.
Претходно, истиот ден во 13 часот и 14 минути Герговска го известува сведокот членовите да се соберат пред Музејот на ВМРО во 16:40. Оваа порака за собирање на членството во 16:40 пред Музејот на ВМРО, Герговска речиси секој ден му ја испраќа на Сашко Коцевски, уште од 13 март 2017 година, при што повикува за се поголема излезеност и повик на членството од месните комитети и администрацијата.
Од пораките може да се забележи дека секојдневно било повикувано членството на ВМРО-ДПМНЕ масовно да излезе на протестите „За заедничка Македонија“, иако во тој период организаторите на протестите велеа дека тие не се партиски и дека немаат врска со ВМРО-ДПМНЕ, туку дека се работи за изреволтирани граѓани од Тиранската платформа.
Виктор Јованов